احاجي سودانية {{ احاجي الحبوبات }}

احاجي سودانية {{ احاجي الحبوبات }}
حجيتكم مابجيتكم,,خيرا جانا وجاكم,,قالوا: ابدأ ليكم بالقصة المعروفة قصةفاطمة السمحة ..!!!
فاطنة القصب الاحمر كانت أسمح بت في الحلة,عشان كده سموها فاطنة السمحة واي ولد في الحلة كان بيحلم يعرسا. يوم فاطنة مشت البحر ودخلت تعوم ورجعت البيت,, بعد داك جاء ولد عمها محمد يسقي الحمار حقو ,, وفجأ كده واثناء الحمار بيشرب بقى يهنق شديد ورقد في بطن الواطة زي كانو حاجة وقفت ليهو في حلقو,, محمد حاول يشوف الحصل علي الحمار لقى سبيبة شعر في حلق الحمار,,السبية كانت طويلة طول شديد محمد حلف يمين الا يعرس صاحبتا.
اها بعد كده اي بت في الحلة قاسو شعرها بالسيبة وكلو كلو ما لقوها,,في النهاية قالو يمكن تكون حقت فاطنة,,فعلا قاسوها طلعت من شعرها,,محمد قال الا يعرسا,,الجماعة قالو ليهو ماممكن لانو كان صغير شديد,,وهي كانت أكبر منو بي خمسة سنين,, ابا كلو كلو يتنازل عن قرارو.
يوم العرس لبسو فاطنة داك يا التوب وملوها بالدهب,,كانت جميلة جمال شديد,,طبعا فاطنة كانت رافضة العرس قامت واثناء الناس مشغولة شردت من البيت وجرت على الغابة,
بقت ماشة بين الشجر زمن طويل شديد,,فجأة لقت راجل عجوز مشت عليهو,,بعد سلمت عليهو قالت ليهو عمي اذا عايز تتطلع جلد عجوز تعمل ليهو شنو؟ قال ليها كان طقيتي عجوز بي شوكة في نص رأسو جلدو بيطلع,, فاطنة بسرعة شالت شوكة وطقتو في رأسو وطلعت جلدو لبستو,, بقت متنكرة في صورة العجوز.
بعد كده بقت ماشة وماشة وماشة لحدي وصلت ليها قصر كبير,,دخلت القصر وقالت عايزة تقابل الامير,,,اهاا قالت لي الامير عايزة تشتغل عندو,, الامير قال لي: بتعرف تزرع؟,, العجوز قال لي: ما فيني قدرة على الزراعة,,الامير قال لي: بترعى الغنم ؟ العجوز قال لي: بيجرن بعيد مابقدر ألحقن,, الامير قال لي: طيب بتعرف تعمل شنو؟ العجوز قال لي بعرف ارعي الوزين (يعني طيور الوز),, الامير قال ليهو خلاص كويس تاني كل يوم من الصباح تمشي البحر ومعاك واحد من الخدم ترعوا الوز وترجعوا مع الغروب.
اليوم التاني من الصباح طلع العجوز ومعاهو خادم بيكم(يعني ابكم),,لمن وصلو البحر العجوز طلع الجلد وظهرت فاطنة وكمان طلعت الدهب اللابساهو وختتو مع الجلد,, وطبعا الخادم مخلوع شديد لكن مابيقدر يتكلم,,اهاا فاطنة دخلت البحر مع الوز وبقت تغني.......
شن بدور يا بيكم..
كورعين حمام يا بيكم..
ريش النعام يا بيكم..
شعرا طويل يا بيكم..
متل الحرير يا بيكم..
واستمرت تغني كده والوز يرقص معاها لحدي الغروب,,طلعت ولبست الدهب والجلد,,والوز بيّض بيض كتير شديد,, لمن رجعوا القصر الخادم حاول يقول للامير شئ بقى يقوم ليهو اممم ام اممممم ويأشر,,والامير ماقدر يفهمو قام سأل العجور,,العجوز قال لي: بيقول ليك عيان كوكوني بالنار مشو كوهو بالنار.
برضو اليوم التاني مشى معاها خادم تاني,, برضو بيكم وحصل نفس الشئ,,الامير لمن سأل العجوز قال ليهو بيقول ليك يدي واجعاني اقطعوها لي,, وقطعو للخادم يدو,, بعد كم يوم الامير شك انو في شئ بيحصل في البحر.
اليوم البعدو الامير مشى قبل العجوز والخادم وطلع في شجرة جنب البحر,,لمن وصل الخادم والعجوز حصل نفس شئ طلعت الجلد والدهب ودخلت تعوم مع الوزين,,الامير اندهش شديد,, قام براحة بدون مايحس الخادم مد عصاية وشال خاتم من ختم فاطنة. لمن خلاص وقت الغروب جاء فاطنة طلعت تلبس الدهب والجلد لقت في خاتم ناقص,, قامت تتشاكل مع الخادم "تسرقني أنااا؟؟,,,شكيتك على الله,,اااا,,طلع الخاتم" وضربتو ضرب شديد,,الامير لمن شاف الحاصل رجع الخاتم براحة,, هي شافت الخاتم شالتو ولبست الجلد ورجعت مع الخادم القصر.
اليوم البعدو الامير نادى العجوز قال ليهو عمي العجوز رأيك شنو تلعب معاي شطرنج لكن البيفوز يطلع جلد التاني,,لعبو أول مرة فاز العجوز,,الامير قال ليهو: أعفيني,, العجوز عفى ليهو,, لعبو للمرة التانية وبرضو العجوز كسب,,الامير قال ليهو: اعفيني,,العجوز برضو عفى,, تالت مرة كسب الامير,,العجوز قال ليهو: اعفيني,,الامير ابا يعفي ليهو,, وشق جلدو وظهرت فاطنة السمحة.
بعد داك حكت لي الامير قصتها مع اهلها,,والامير رجعها قريتها وطلبها واهلها ووافقوا,,واتزوجوا وعاشو في تبات ونبات وخلفوا صبيان وبنات.
ياجماعة اى زول عندو اى قصة من احاجى حبوباتنا اسردها هنا
اديكم العافية

ام دهيبون
***************
كان في قرية بنت جات اخر العنقود وكان الفرق بينها وبين باقي اخوانها واخواتها كبير شديد.ابوها واخوانها كانوا من اكبر التجار ودلعوها دلع شديد.كانت اكثر البنات ذهبا مكنكشة كنكيش ما عادي.عشان كده سموها ام دهيبون.
يوم اتلموا البنات يلعبوا ومشوا على جه الغابة لقوا ليهم شجر نبق(سدر) شايل شيل تقيل. وقاموا اتفقوا زول يطلع يحت النبق والباقين يلقطوا.
قالوا لي ام دهبون انتي مدلعه وطلوع الشجر ما بتقدري عليه.
وهي زعلت واصرت تطلع وفعلا طلعت.وحتت ليهم النبق كلوا.بقوا هم يلقطوا في النبق السمح ويختوا ليهم والكعب والني يختوه ليها.لحدي ما نزلت.
وكل زول شال نبقوا وكان مصرور.لحدي ما وصلوا البئر.
قالوا نشوف نبق كل زول.
كل وحده نبقها اسمح من الثانية الا ام دهبون حقها كلوا كعب.
زعلت شديد وقالت انا راجعه تاني ألقط ارح معاي.كلهم ابو.وقالوا تعبانين بنستناك جمب البئر دي. وهي مشت براها زعلانة من حقارة البنات.
لقطت نبق اسمح من حقهم ورجعت ليهم.وورتهم نبقها وهم اتغاضوا شديد.سالتهم انتوا شربتوا بشنو؟؟
قالوا ليها رمينا ذهبنا والموية طفحت جابت لينا ذهبنا وشربنا.
قالت ليهم يعني انا لو رميت ذهبي بيجيني تاني؟؟؟.
قالوا ليها اي نحنا عملنا كده.
وفعلا شالت ذهبها كلوا ورمتوا في البئر.
بعد ما شالت ام دهيبون دهبها كلو ورمتوا في البئر
وقعدت استنت الموية تطلع وترجع ليها الذهب
ولا حس ولا خبر
والبنات قعدوا يضحكوا فيها
غشيناكي يا عويرة
شربنا ودسينا الجركانة
ومشوا خلوها
وهي قعدت متمحنة في المصيبة الجاتة بلادتها في تصديق البنات
وفجأة جات هبوب صفرااااااااااااااااااااااااا
قامت قعدت تكورك الله لي منك يا الهبوب
والهبوب ردت عليها
الله ليك من الوراي!!!!!!!!!!!!!!!
وجات بعدها هبوب حمراااااااااااااااا
وقعدت تكورك ليها
الله لي منك يا الهبوب
والهبوب ردت عليها
الله ليك من الوراي!!!!!!!!!!!!!!!!!!!!!!
وجات بعدها هبوب سوداااااااااااااااا
وقعدت تكورك ليها
الله لي منك يا الهبوب
والهبوب ردت عليها
الله ليك من الجواي!!!!!!!!!!!!!!!
وفجأة طلع ليها غول:000:
وام دهيبون قعدت تبكي وتبكي بكاء يقطع القلب
الغول قال ليها مالك يا بت قعد تبكي
قالت ليه بنات الحلة غشوني وخلوني ارمي دهبي كلو في البئر
الغول قال ليها انا بطلعوا لكن بشرط تعرسيني
ام دهيبون وافقت كان ابت حياكلها الغول وما في اي فائدة
قالت ليه اي بوافق
والغول قعد يشرب ويشرب في موية البئر لمن خلصت وطلع ليها ذهبها كلوا
وخطف ام دهيبون ومشى
البنات لمن رجعوا خافوا على ام دهيبون الخلوها براها وخافوا تكلم اهلها
ولمن رجعوا ليقوها مافي
وجروا لي اهلها كلموهم
ووروهم انهم رجعوا ما لقوا ام دهيبون
واهلها رجعوا معاهم وما لقيوا حاجة
قصوا الدرب لقيوا اثر الغول
وقال كدي نمشي للعجوز نسالها عن العمل
ومشوا للعجوز
وقالوا:عجوز كلامك يجوز ورينا نعمل لي بتنا ام دهيبون شنو
العجوز قالت ليهم تمشوا لي بيت الغول
لقيتوه نايم معناه صاحي
لقيتوه مفتح معناتوا نايم تكسروا اي حاجة في البيت وتشيلوا بتكم وتجروا وتمسوا الدرب الوراكم.
وفعلا مشوا لقوه مفتح
كسروا العده الفي البيت ونسوا الحجر البيطحنوا بة (الدحاية)
وشالوا ام دهيبون وجروا
بقت الدحاية تطير فوق وتنزل تضرب في راس الغول ويكورك: غول يا غول قوم يا غول
بتك ختفوها الرجال
الغول قام على حيلو وفتش وما قدر يلحقهم عشان الدرب الممسوح
واتغاظ غيظة
لكن يعمل شنو
وام دهيبون اتعظت وبقت ما بتمرق ذهبها خالص لأي سبب

ام توب بني
في منطقه من مناطق سودانا الحبيب كان في رجل متزوج وله سنين كثيره شاء القدر انو يحرم من الاطفال.وكان هذا الشي بيحزنو وماثرو.
في يوم من الايام مع الصباح قام يدعي بالخلف الصالح وفعلا استجاب لي دعاه وولدت له طفله فرحه عمرو.فرح بيها فرح ماعادي وكل ما كانت الطفله تكبر فرحوا كان بيزيد معاها اكتر.
واصبحت شابه وكانت بتحب اللون البني وما بتلبس غيرو عشان كده اشتهرت بام توب بني.كانت اجمل بنات الحته .لونها اصفار زي الذهب وعيون كبااااااااار ورموش طواااال زي السيوف متراصة وشعر اسود من الليل وفي نص ظهرها والحواجب هلالين عديل مرسومات .لاطويله ولا قصيره لا سمينة ولا ضعيفة.كفانا من الوصيف الباقي اكيد بتعرفوه. كان عندها اعذب صوت لمن تغني الجميع بيسكت.
كل الصفات دي خلتها تكون محسوده من جميع بنات الحله.الداير يخطب يخطب ام توب بني البيحب ويعشق ام توب بني .ام توب بني هي السمحه. ام توب بني هي الظريفة اللطيفه ........... ام توب بني..........ام توب بني........... ام توب بني اي حاجه ام توب بني.
ابوها وامها كانو بيخافوا عليها شديد كيف دي ما البكر والحتاله.
جاء يوم اتلموا فيه بنات الحله وقالوا نحنا خلاص كفانا زهجنا ودايرين نقعد كده اي زول داير يعرس يمشي لي ام توب بني .هي زاته قاعده ترفض ومابية اي زول.كان عرست كان خلصنا من الموضوع بدل ما مطفشه لينا العرسان.
المهم الحقد والغيره عمتهم وقاموا اتفقوا يغدروا بيها.
لمن اتفقوا البنات عليها والغيره عامياهم قاموا مشوا ليها وقالوا ليها (ارح نمشي البحر نعوم) قالت ليهم انا امي قعد تحميني امشي البحر وانا ما بعرف اعوم.قالوا ليها ما تقولي ليها وانتي الوحيده في بنات الحله الما بتعرفي تعومي.كده امشي معانا بنعلمك.
المهم يحنسوا ويحنسوا لمن رضت تمشي معاهم.ولمن نزلوا البحر دخلوا عاموا لي جوه ولزوها بعييييييد .وطلعوا هربوا.
ام توب بني غطست الغطسه الاولى وطلعت. وغطست الغطسة التانية وطلعت.وغطست الغطسة الثالثة وما طلعت.......؟؟؟؟؟؟
جات سمكه كبيييييييره وبلعت ام توب بني مع غطستها الثالثة.
قعدت ام توب بني في بطن السمكة يوم كامل.
ورحمه من ربنا اصطاد السمكة صياد.وبعد تعب طلع السمكه هو ومعاه اكتر من 10رجال وفرحانين فرح شديد.ام توب بني سمعت صوت الناس هايجة بقت تكورك (طلعوني طلعوني) الناس خافت وقالت السمكة بتتكلم.الصياد لاحظ الحركة في بطن السمكة,طوالي شال سكينة وشق بطن السمكة.وكانت الغريبة والعجيبة البنت الطلعت من جوف السمكة.
الصياد قال ليها يا بتي احكي لي قصتك ودخلتي جوه السمكة كيف.
وحكت ليه القصة كلها.
قام حن عليها وقال ليها تمشي معاي البيت وتقعدي مع بناتي لمن تلقي اهلك.
وقعدت مع اهل الصياد.
وكل يوم تطلع مع بناتو يلقطوا حطب الوقود.
تمشي تقيف تحت شجرة كبيرة وتغني.
(يا يمة........... يا يمة
انا ام توب بني
والبنوت رمني في البحرني
يا يا به............. يا يابه
انا ام توب بني
والبنوت رمني في البحرني)
وتقعدت تبكي بكى يقطع القلب
كل يوم بنفس الطريقة.
اما عن اهل ام توب بني.ما عرفوا بنتهم دي مشت وين.خطفها غول ولا وحش ولا مشت وين مافي زول عارف عارف عنها حاجه. امها مرضت مرض شديد وبقت ما بتتحرك.والاب كل يوم يمشي البحر تنزل دموعوا ويرجع البيت لا بيكلم زول وكل يوم بنفس الطريقة.
ومرت الايام.
في يوم ولد السلطان طلع يصطاد.وجابو القدر جمب الشجره البتغني فيها ام توب بني,وسمع غناها وبكاها.وعجبتوا عجب شديد. طوالي جاها وقال ليها ابشري يا ام توب بني اي حاجه دايراها تلقيها. ام توب بني خافت وجرت على بنات الصياد.وبنات الصياد عرفوه.وطلب منهم يمشي معاهم يقابل ابوهم.وقعد مع الصياد وحكى ليه القصة.وانو لحدي هسي مافي زول عارف عن اهلها حاجة ولا الجهه الجات منها.
ولد السلطان وعد ان يساعدهم ويلقى لام توب بني اهلها.
قام ولد السلطان سافر مده ثلاث ايام عشان يلاقي العجوز.
(العجوز دي يعني الحكيمة ومرأه مبصره بتشوف وبتعرف )
واول ما دخل قال ليها عجوز كلامك يجوز.
وريني اهل ام توب بني وين.
العجوز قالت ليه تمشي البحر وتتجه جه الشرق بعد عشرة ليالي تلقى روحك عند اهلها.
فرح ولد السلطان.وكلم الصياد وام توب بني
وفعلا سافروا والصياد حلف الا يمشي معاهم يوصلوا ام توب بني.
في اليوم العاشر مانامت ام توب بني الليل كلوا وفي صباح تعاين لي بعيد لقت ليها ارض باينه من بعييييييييد لمن قربت عرفت البيوت وبقت تكورك ديل اهلي ديل ناسي.وتلمت اخيرا بامها وابوها وحكت ليهم القصة من البنات رموهافي البحر والصياد لقاها لحدي مارجعت ليهم كيف. وطلبت يعفوا عن البنات.
وولد السلطان طلب من ابو ام توب بني انوا يعرسهاوالاب قال ما بيوافق الا الصياد يوافق.
والصياد طبعا وافق وتم العرس.
والبنات كان عقابهم انهم عنسوا ومافي زول اشتغل بيهم وبقوا منبوذات من الجميع.

ثلاث اخوان
كان في راجل عندو ثلاث اولاد وعندوا شجرة تفاح بتشيل مره في السنة ثلاث تفاحات.كل تفاحة بتستوي بعد التانية بيوم.يعني الاولى واليوم البعدو التانية وهكذا.
وكان في غول بس مصاقر التفاحات دي.يجي كل سنه كل يوم ياكل تفاحه لمن يخلصوا.
الاب اضايق شديد من الحركة دي.واستنى اولادوا لمن كبروا.وناداهم في يوم وقال ليهم كل زول يحرس تفاحتوا.
اليوم الاول كان على الولد الكبير.وده كانت مدلعه حبوبتو.ابوه اداه سيف طويل وقال ليه احرس تفاحتك.
الولد قاعد الليل كلو ولمن جه الغول خاف منو ودسه.والغول اكل التفحه ومشي.
الاب لمن عرف زل من ولدو زعل شديد لكن يسوي شنو نادى الولد الثاني وطلب منو يحرس تفاحتو.
اها الولد الثاني كانت مدلعه اموا دلع شديد.وقعد الليل كلوا لمن جه الغول خاف منو ودسه زي اخوه الكبير.
الاب قرب يموت تاني يوم اولادوا الاثنين والكبار طلعوا خوافين.
لكن العمل شنو.وجه دور الصغير.
الصغير كان احسن واحد فيهم.وقعد الليل كلوا منتظر لمن جه الغول قام ضربوا بالسيف.الغول جرى. وولد الصباح حكى لابوه وشافوا دم الغول عامل اثر.والتفاحه قاعده في الشجره.الاب قطفها واداها لولدوا الصغير فرحان.
الاب قال لازم نمشي نقص الدرب ونقتل الغول ده ما بنرتاح منو الايموت.
قام الاب واولادو قصوا دم الغول لحدي ما وصلوا لي حفرة كبيرة.الحفرة دي بتنزل سبعه اراضي تحت.الاب قال لاولادوا جيبوا حبل وينزلو للحفرة تحت.الاب طلب من الابن الاكبر انو ينزل اول.طبعا هو بيخاف لكن قال لابوه بيحاول.ابتدوا ينزلوه لمن ظلمت الحته قعد يكورك (ارفعوني ارفعوني).وطلعوه من الحفره.الابن الثاني نزل وبرضوا ما وصل نص المسافة قعد يكورك (ارفعوني ارفعوني).ورفعوه الابن الصغير قال لابوه نزلني ولو قلت لك ارفعوني ما ترفعوني نزلوني زياده.
وفعلا شغال ليهم نزلوني نزلوني لمن وصل اخر الحفرة.
ولقى شنو !!!!!!!!!
لقى ثلاث بنات ووحده فيهم جميلة جمال ما عادي.قام سالهم انتوا من وين.قالوا نحنا خطفنا الغول من اهلنا.وسالهم الغول وين.قالت ليه احلى وحده فيهم في اخر الممر ده لكن اعمل حسابك الغول لمن يكون مغمض عيوني يعني صاحي ولمن يكون مفتح نايم.اضربوا ثلاث ضربات لو قال ليك زيدني ما تزيدوا.
وفعلا مشى طوالي لقاه مفتح عيونو.وبسيفوا ضربو الضربة الاولى والضربة الثانية والضربة الثالثة .وبعدها قعد يكورك زيدني زيدني.وطبعا كان عارف اللعبه كويس وابى ما يزيدوا.
والغول طوالي روحوا مرقت.وبعد ما مات فرح الابن الصغير.
ومشى للبنات قام طلع البنت الاولى والبنت الثانية والبنت السمحة قال ليها انا بطلع وانزل لك الحبل (خاف اخوانوا يتشاكلوا فيها)والبنت قعدت تبكي وخافت يخلوها ويمشوا.المهم حن عليها وفعلا طلعها قبلوا.
وحصل الكان متوقعوا الاخوين اتشاكلوا في البنت والاب قعد يحاول يحجز وقام الحبل اتفلت ووقع وخلوا بطلنا قاعد تحت في اخر الحفرة على بعد سبع اراضي.
آه لمن البطل فضل تحت.وبقت عليه مصيبتين.البنت السمحة الراحت.وقعادوا في الحفرة.
قام صاحبنا مشى تحت.ولقى العجائب.نفس الفوق تحت ولقى بحر وقعد يتامل فيه.بعد شوية سمع صوت زول بيبكي.قام يفتش ويتلفت.ولقى شافعة بتبكي.وسالها مالك.قالت ليه في تمساح كبير قاعد في البحر ده ،ولا بيخلي زول يشرب منو.واي زول اي حيوان اي شي يقرب يبلعوا.واهلي بقوا عطشانين.وحالتنا حالة.قام دق صدروا وقال ليها ما تخافي بعون الله اقدر عليه.ومشي عند طرف البحر.وفجأة طلعت موجة كبيرة وطلع منها التمساح.كبير شديد ولونة اسود ومخيف.وبسرعة جه فاتح خشموا يبلع البطل.قام طوالي بسيفوا ضرب التمساح وقطع ليه راسوا وقتلوا.البنت فرحت فرح وجرت لي اهلها كلمتهم.
اتلموا الناس يشكروا فيه وعلى حسن الجميل.البنت الصغيرة جرت وجابت ليه توب مرسوم في سحاب ونجوم وقالت ليه ده توب السماء.وعليك الله شيلوا بتحتاجوا واصرت عليه.واهل القرية قالوا له لو احتجت اي شي قول لينا.
قال ليهم داير اطلع فوق .قام واحد كبير اشر ليه فوق في الجبل في راجل عجوز بيعرف اي شي امشي عليه واسالوه.
قام مشي طلع الجبل ولقى الراجل العجوز بيرعى في الغنم وحدات بيض ووحدات سوود.
وسالوا كيف الطلوع لي فوق.
العجوز قال ليه شفت غنمي ديل غمض عيونك وامسك وحدة من الغنم ديل لو طلعت بيضاء بطلعك فوق ولو سوداء حتغطسك تاني سبع اراضي لتحت.
البطل قام غمض عيونوا ومسك وحده لمن فتح عيونوا لقاها سوداء.وهب لقى روحوا نزل سبع اراضي تاني لي تحت.حظوا تاني خانوا.
وهو ماشي يلعن في حظوا فجأه الارض ظلمت وعاين لي فوق لقى طائر كبييير وضخم.نزل تحت وخطف ليه خروف .وبعد شوية تاني جه.وفكر يمكن الطائر ده يطلعني .ومشى براحة واتعلق في الطائر.
الطائر طار وركه في عشوا.ورمى الاكل لي كتاكيتوا.البطل نزل وقعد في العش .وخلي الطائر يطير بعيد.
كان تعبان شديد.ونزوي في ركن العش ونام.
صحى على صوت الكتاكيت بتكورك خايفة،ولقى الدبيب ماشي عليها. بسرعه ضرب الدبيب وقتلوا.وشالوا جدعوا بره العش.الكتاكيت حبتوا لانو انقذها واتلمت حولينوا.وفجأة جات امهم.وشافتوا قاعد في العش.وهجمت عليه دايرة تقتلوا.الكتاكيت اتلمت فيه وغطتوا وقعدت تصرخ في امها ما تقتليه ده انقذنا من الدبيب كان داير ياكلنا.يأمنا عايني برة العش.
وفعلا عاينت لقت الدبيب مقتول.وتاسفت للبطل وشكرتوا على انقاذ اولادها.وقالت ليه اطلب اي شي.
قال ليها داير اطلع فوق. فوق 14 ارض.
سكتت شوية الطائر الام وقالت ليه الرحلة متعبة لكن انا بوصلك.لكن انا بحتاج لي 10خرفان.و20قزازة موية عشان توصلنا.قال ليها ما مشكلة وفعلا لم العشر خرفان.والعشرين قزازة موية.وربطهم وشالهم فوق ظهر الطائر الام.والكتاكيت اتلمت فيه.وادتوا توب مرسوم فية جبال وانهار وقالت ليه ده توب الارض.شيلوا بتحتاجوا.
وفعلا الرحلة كانت صعبة وطويلة وهو كل شوية يجدع الاكل والموية للطائر لحدي ما وصلوا.
وبعد وصل فرح بعودتوا وشكر الطائر.وتجه لي بيتوا.
لقى الاب قاعد واول ماشافوا فرح بيه بعد ما افتكروا مات تحت في الحفرة.
البطل حكى للاب القصة كلها.
وسالوا من البنت الاخيرة الاب ضحك.وقال ليه البنت دي طلعت بنت السلطان.واخوانك الاثنين مشوا يخطبوها ورفضتهم قالت مهرها توبين.توب السماء وتوب الارض.
ويا ولدي التوبين عندك ارح هسي نمشي نخطبها.
ومشوا لي السلطان وحكوا ليه القصة وكيف التوبين وصلوا عند البطل.السلطان فرح وقال للبطل والله كان جيتني من غير التوبين انا كنت ح اعرس ليك بنتي.
وقامت الافراح بزواج البطل بالاميرة بنت السلطان

الحب الحقيقى
كان يا مكان في قديم الزمان رجل فقيرشهم باسل قوي يظهر الحق ويزهق الباطل لكنه يشكو ويعاني من مرارة الوحده لا انيس ولا ونيس له الا سيفه وذراعه وكوخه الصغير ذات يوم خرج الى بلدة مجاوره للصيد لفت انتباهه فتاة تقطف الزهور إقترب منها ذهل بعيناها السوداوتين وشفتاها الحمراوتين ووجنتيها الورديتين إنبهر وأعجب بها ألى حد الجنون وهي الاخرى سقطت في شباك الرجل الفقير وأعجبت ببسالته وشهامته التي تقطر من جسمه الصلب سالها من أنت اجابته بكل تواضع أنا بنت ملك هذه البلده نزلت معنويات الشاب وردد في نفسه الفرق بيني وبينها شاسع هي بنت القصور وأنا إبن الكهوف سوف أمضي إلى حال سبيلي أحسن ,ودعها بقلب جريح ومرير أسف سيدتي على الازعاج إلى اللقاء. حل الليل والشاب في كوخه لم يغمض له جفن عقله وجوارحه سرقتها الاميرة وهي بدورها في قصرها تخمم فيه وتتمنى لو تلقاه مرة اخرى أصبح صبح جديد خرج للصيد ومرة اخرى يراها في نفس المكان كانها تنتظر شخصا ما ليصل اقترب منها بجسم يرتعش اخبرها بالليلة السوداء التي قضاها وهي بدورها صارحته وأفرغت ما يروج بقلبها تطورت علاقتها أصبحا يلتقيان في السر عن أب الاميرة توثقت حبال الحب بينها أضحيا روح واحده يجمعها العشق والهوى شاءت الايام والاقدار أن ياتي أمير ليطلب يد الاميره ,إستقبله أبوها بحفاوه مظهرا رغبته وقبوله للزواج بإبنته أخبر الملك ابنته بالامر رفضت بشده وأمتنعت عن الزواج به. بدا غضب على ابيها ما العيب فيه إبن أكابر فارس ليس له مثيل فائق الجمال سوف تتزوجينه شئت ام ابيت. حرام عليك أبي لماذا أنت مصر لترمي إبنتك الى الجحيم الحب ليس فيه مال ولا جاه أنا أحب شخصا أخر زاد غضب ابيها وقال لها اسمعي جيدا انا صاحب الشان والقرار استعدي العرس الاسبوع المقبل ذهبت الاميره مسرعه الى حبيبها وعيناها تملاؤها الدموع أخبرته بقدوم رجل ليخطبها. ضحك الشاب الفقير لما سمع وأجابها لماذا أنت خائفه أنت ولدت لي وانا لك لن يفرقنا أحد سوف أواجه الصعاب وأدخل حرب الهيام لن تكوني لغيري حتى لو دخلت معركه ليست لها نهايه هذا الوجه المشرق خلق لي وحدي وقلبك ملك لي ليس لامير أخر
حبك سيهزم الصعاب ويفعل المستحيل هيا امسحي دموعك . ابتسمت الاميره . وعاشت معه في كوخه اسابيع الى ان وشي بمكانهما ففرا هاربين من جور وطغيان الامير والملك
توالت الأعوام والسنين من البحث إلى إن وجد جثمان شخصين متعانيقين في إحدى الصحاري المهجوره

عرس نفيسه
- طارق آآآولدي قوماك دلني لا تحت جنب جدودك في شجرة ناس ود جبارة - سمح قوماكي - أدني عكازي واندلينا لاااا تحت عند بير ود جبارة - عوض السيد: اهلا بالمرة القاهري - مافي زولا قاهر قدركم الله لا تكسبكم - طارق امشي املالي حقتي دي صعوط من دكان العوضابي وجيبلي معاك سيجاري ألت برنجي - ود جبارة: انت لليلي تسفي وتسجري دحين مو حجيتي - أيي حجيت واسجر واسف التمباك عندك مانع - ود جبار (يضحك): اصلك من يومك قاهري وماك نصيحي ..... مشيت علي دكان العوضابي وخليتم خمسة رجال وامرأة... شيوخ على حافة القبر يقضون جل وقتهم في اجترار ذكريات صباهم يحكون عن أيام مضت منذ زمن بعيد لا يتحرجون في الكلام ولا ينتبه لحديثهم أحد يلقون الكلام على عواهنه لا يعنيهم من محيطهم غير طفل يرسلونه حيث يريدون او امرأة تأتيهم بالطعام ..... جبت الغرد أليل نفيسي كان اسمعلك: - عوض السيد (ميت من الضحك): الرسول آآنفيسي عرستي ود عمنا دة كيفن - كدي خلني اللسف واسجر - رابح: أصلك من يومك علي الرجال - جيت يا عوض السيد مندلي لااا تحت شايلالي حرف أليل قراصي لي ابوي وجنب البير أكان القالك ود الطيب طالع وفي ايدو برسيم سلم علي وقلتلو: انت يا ود الطيب بقيت تحد زي النسوان كمان مرتك ماتت ليها سنين وانت لليلي مابي العرس - عوض السيد: الله يقلعك آآآبتتقدري - ود ناس الطيب: عندك لي عروس آآآنفيسي - انا مالي آآآبتعرس - تعرسيني آنفيسي - ان بقيت دايرني بكلم ابوي الكلام لا يبقى فسو ساكت - خلاص ان بقيتي قابلابي عوجة تب مافي - عوض السيد: الله لا تكسبك يا مقطوعة الطار - نفيسي: اندليت علي ابوي تحت يا عوض السيد ولقيتو يحفرلو تحت تمرة وقلتلو: ابوي ود ناس الطيب دة قال دايرني دحين نجض معاهو الكلام في صلاة العشاء

- جدنا بغداد: انت نان بقيتي للعرس
- نفيسي: كدي يابا شوف فهموا شنو انا هيني
- رابح: آآآبتستحي من يومك
- نفيسي: وحاتك آآآرابح العشي بقالي طويل خلاص وبقيت اتاوق علي جية ابوي من الجامع... ووكتين جاء ما قالي شي اتعشى ورقد نام... وانا الوردي مسكتني
- وراسي بقى يودي ويجيب يا ربي ابوي اباهو ولا السجمان ما فتح الكلام معاهو
- صبحت الدني وانا اوجوج من هني لا هني علي الجدادي الدايري ترمي البيض
- اندليت لا عند ابوي ما شفتو... شويتين اشوفه شايل طوريتو وجايي من لااافووووق
- حدرتلو زين وطلعت لي اهلي...
- الواطة مغربت وانا اتاوق لي طلعة ود الطيب لامن شفتو طالع علي بيتم
- لفحتة طرحتي ومشيت عليه قبل لا يمسك كُشر الباب:
- انت آآآود الطيب تكذب علي وتخليني أكلم ابوي وما تكلموا
- ود الطيب: والله آآنفيسي غلبني اقوله خجل منو... يقول شنو انا بقابلك من وراهو عاد
- الخجل اليقطع مصارينك وحات النبي ما تمشي قدامي هسي ليهو علي اكورك ألم عليك خلق الله هني واقولهم ود الطيب يجرجر فيني من طرحتي
- عوض السيد (ضاحكا بشدة): نجيضي الله يقلعك... أهاااا
- نفيسي: وحاتك ود الطيب قلع عيونه وبقى يرجف وشبكني: آآآنفيسي بمشي معاكي بس لا تضيعيني... وقلتلو ان بقيت راجل ما تجي انا سابقاك للبيت
- ود جبارة: الخرابة آآآبتعرفي الخوف
- نفيسي: جملة الايمان يا ود جبارة جاء وراي ودقة الباب وطلعتلو وقالي ابوك في... وانا اكورك بي طول حسي: أييي يا ود الطيب ابوي لا جوة... فشان ابوي يسمعني
- دخلتو علي ابوي ومشيت علي الطاقة اتصنت في كلامو
- عوض السيد: أها شن قال؟؟؟؟
- نفيسي: اسمع فيهو يقول لي ابوي يا عم بغداد انا جاييك في غرد خير
- رابح: أها يا خرابي
- نفيسي: المهم يا رابح كلم ابوي وانا بقيت اوجوج من هني لاهني
- وازازي بين الطاقي والتكل تقول بطني ماشي (عندي اسهال) لامن مشى لي اهلو..
- وابوي ناداني وقالي رأيك شنو
- عوض السيد: أها شن قلتي يا خرابة
- وحاتك يا عوض السيد بقيت ازغرد لامن ابوي نهرني...وعرسته
- الجميع يضحكون: الله لا تكسبك ماك نصيحي

الشجره العملاقه
في قديم الزمان كانت هناك شجرة تفاح ضخمة
و كان هناك طفل صغير يلعب حول هذه الشجرة كل يوم
كان يتسلق أغصان الشجرة ويأكل من ثمارها ... ثم يغفو قليلا لينام في ظلها
كان يحب الشجرة وكانت الشجرة تحب أن تلعب معه
مر الزمن.... وكبر الطفل
وأصبح لا يلعب حول الشجرة كل يوم
في يوم من الأيام ... رجع الصبي وكان حزينا
فقالت له الشجرة: تعال وألعب معي
فأجابها الولد: لم أعد صغيرا لألعب حولك
أنا أريد بعض اللعب وأحتاج بعض النقود لشرائها
فأجابته الشجرة: أنا لا يوجد معي نقود
ولكن يمكنك أن تأخذ كل التفاح الذي لدي لتبيعه ثم تحصل على النقود التي تريدها
الولد كان سعيدا للغاية
فتسلق الشجرة وجمع كل ثمار التفاح التي عليها وغادر سعيدا
لم يعد الولد بعدها
فأصبحت الشجرة حزينة
وذات يوم عاد الولد ولكنه أصبح رجلا ...!!!
كانت الشجرة في منتهى السعادة لعودته وقالت له: تعال والعب معي
ولكنه أجابها : لا يوجد وقت لدي للعب .. فقد أصبحت رجلا مسئولا عن عائلة ..
ونحتاج لبيت يؤوينا
هل يمكنك مساعدتي ؟
آسفة
فأنا ليس عندي بيت ولكن يمكنك أن تأخذ جميع أغصاني لتبني بها بيتا لك
فأخذ الرجل كل الأغصان وغادر وهو سعيد
كانت الشجرة مسرورة لرؤيته سعيدا ... لكن الرجل لم يعد إليها
فأصبحت الشجرة وحيدة و حزينة مرة أخرى
وفي يوم حار من ايام الصيف
عاد الرجل .. وكانت الشجرة في منتهى السعادة
فقالت له الشجرة: تعال والعب معي
فقال لها الرجل لقد تقدمت في السن.... وأريد أن أبحر لأي مكان لأرتاح
فقال لها الرجل: هل يمكنك إعطائي مركب
فأجابته: خذ جذعي لبناء مركب... وبعدها يمكنك أن تبحر به بعيدا ... وتكون سعيدا
فقطع الرجل جذع الشجرة وصنع مركبا
فسافر مبحرا ولم يعد لمدة طويلة
أخيرا عاد الرجل بعد غياب طويل
ولكن الشجرة قالت له : آسفة يا بني ... لم يعد عندي أي شئ أعطيه لك
وقالت له:لا يوجد تفاح
قال لها: لا عليك لم يعد عندي أي أسنان لأقضمها بها
لم يعد عندي جذع لتتسلقه
فأجابها الرجل لقد أصبحت عجوزا ولا أستطيع القيام بذلك
قالت: أنا فعلا لا يوجد لدي ما أعطيه لك
قالت وهي تبكي .. كل ما تبقى لدي جذور ميتة
فأجابها: كل ما أحتاجه الآن هو مكان لأستريح فيه
فأنا متعب بعد كل هذه السنين
فأجابته: جذور الشجرة العجوز هي أنسب مكان لك للراحه
تعال .. تعال واجلس معي لتستريح
جلس الرجل إليها ... كانت الشجرة سعيدة ... تبسمت والدموع تملأ عينيها
هل تعرف من هي هذه الشجرة؟
إنها والديك
أحبَ والديك
تدارك نفسك وأرضي والديك قبل أن تفقدهم
فهنيئا لمن يملك الوالدين وأذكرهم بالدعاء